Dedicata alla Vergine Addolorata, che si venera nella chiesa della Reale Arciconfraternita del Santissimo Sacramento e Natività Maria Vergine ( Sant'Agnello ).
Maria c’astrigne mmano chisti chiuove,
penzànno a Ggiesù Cristo ncopp’â croce,
a tte guardàmmo e ssempe ce cummòve,
‘sta faccia appecundruta e ssenza voce.
Càpa calàta, cu ’e mmanelle janche,
pàreno spèrze tutt’ ’e penziere tuoje,
ll’anema scura, accussì afflitta e stanca,
te ne staje ferma e pp’‘o dulore struje.
Cèrqua si’ stàta, allèrta sotto â trava,
ombra parènno, sbattuta da ’o maistrale,
’a chella croce ll’uocchie nun scustàve:
d‘ ’o figlio ‘e ccarne, straziate d’’e scurrìate.
Dicce, Maria: “A llà ssotto che vvedive?
forse a ll’ommo carrecàto d’ ’e peccate?
‘A vocia suspirata tu ‘a sentive?
ma ‘o figlio tujo, murènno, ha perdunato!”
E ddicce, quanno viène mprucessione,
a llutto abbàrdata, tutta nera,
nuje pure te cercammo nu perduono,
sotto ô cappuccio cantàmmo:“Miserere!”
Ma sèrve a ccammenà pe ’stu paese,
si ll’orma ‘e Cristo cchiù nun canuscimmo?
isso è tturnato e ccu na mana tesa,
ce sta cercanno e nnuje nun ’o vedimmo.
‘O core sta murenno a ppoco â vota,
’a ggenta s’è scurdata pure ‘o bbene
chesta lucella se sta facenno fioca,
e fforze è ccomm’a nnuje carrèca ‘e pene.
Da na luntana terra si’ vvenuta
addó sciurìsce ‘o mandurlo, ‘a jenestra,
ncopp’a nu bbastemiento si’ ppartuta,
tu facce arritruvà ‘sta via maèsta!
E cquale songo ‘e passe piccerille,
chille cenière pe nun fa’ rummmore,
dicce ca ce vuò bbene, strignatille
‘sti core sbacantàte da ll’ammore.
Chisto subburco ancora è tutto scuro,
ma sta passanno chistu Venerdì,
Addulurata nosta cu tte, sicure,
‘a luce spèrcia e ‘o sole ha ddà trasì !
Nessun commento:
Posta un commento